صباح الخير

sabahelkheir56@yahoo.com

رئيس مجلس الإدارة
عبد الصادق الشوربجي
رئيس التحرير
طارق رضوان

بـحـث

أهم الأخبار

الأخبار

«لسه شايل فأس جدى»

18 مشاهدة

11 سبتمبر 2019



كتب: شوقى شريف

أنا شوقى شريف، فلاح من كمشيش، واحد من الملايين اللى زرعت الأرض السمرة من آلاف السنين، حفيد الفلاح المصرى اللى عاش على ضفاف النيل ولسّه بيزرع الأرض اللى متحولتش لأرض بور بعد ما زرعوها بالحديد المسلح والأسمنت والخرسانة.
أنا الفلاح اللى لسّة شايل فاس جده بيعزق به الأرض، واللى بيقلّب تربتها لجل تتفتح عفية وشديدة فى الشمس والهواء، برضه بمحراث جدى، أمشى على خطوطها أبدر بإيديَّه بذور تنبت بكدّى وحتتروى بعَرَقى.
أنا الفلاح المصرى اللى بتحتفلوا بعيده السابع والستين، اللى اختاروه فى ذكرى وقفة عرابى الفلاح، قدام الخديوى وقام بثورته اللى سماها حركة الفلاحين، أنا الفلاح اللى لسة الجرايد بتنشر صورته وهو بيستلم عقد تمليك أرضه وأرض أجداده من عبدالناصر فى 52.
أنا الفلاح صاحب وزارع الأرض السمرة، خايف على اللى اتبقى منها، لازم نحافظ عليها دى أرض الدلتا الغالية، وكفاية اللى اتقطع من لحمها الحى علشان يتبنى عليها ناطحات سحاب ومولات.
 الأرض لما يتبنى عليها مستحيل تنفع فى الزراعة تانى، لازم نغلّظ العقوبة على كل من يبنى على الأرض الزراعية، لسجن وغرامة وإزالة التعدى مع معاقبة أى مسئول شاف الجريمة وعمل نفسه مش واخد باله، وأى مسئول وقّع على تراخيص البناء وإدخال المرافق.
 بأطالب، أنا الفلاح اللى بتحتفلوا بعيده، بإعادة الدورة الزراعية، عشان تضبط الزراعات الأساسية اللى قايم عليها الصناعة والغذاء الأساسى.
 الدورة الزراعية بتنظم مواسم الزراعة بشكل موحد، بتنظم مواعيد الرى، وبتنظم التسويق، يعنى السياسات اللى لغت الدورة الزراعية علشان نبطل نزرع قمح ونزرع فراولة غلط.
بأطالب بعودة الإرشاد الزراعى، يعنى علم المهندسين وخبرة الفلاحين . كنا بننتظر زيارة المرشد الزراعى وكل فلاح بيسعى أن أرضه تبقى ضمن أرض الإشراف.
كمان لازم يرجع دور الجمعية الزراعية اللى بعد ما كانت مسئولة عن السماد والبذور النقية العفية، كل ده يتصرف بالبطاقة وعلى الحيازة وكل واحد بياخد حقه إنشالله كيلو، دلوقت  الجمعية بتجيب بوتاجازات بالقسط!!.
لازم عودة الجمعية البيطرية وتكليف الدكاترة البيطريين، كنا بنصرف منها علف المواشى، والدكتور يكشف عليها وعلى الفراخ و يدّى إرشادات للتربية، دلوقتى بطلوا يعينوا دكاترة بيطريين شباب، واللى بيشتغلوا كبار واللى بيطلع منهم معاش محدش بيحل محله.
ومع كل ده و قبله لازم دعم الفلاح علشان مايخسرش، ويسيب الأرض ويهج، النهاردة السولار ارتفع سعره، ده معناه ارتفاع تكلفة الرى والسماد والكيماوى والمبيدات والحرث والجمع والنقل وأجرة اللى بيأجرهم علشان يشتغلوا معاه وفى الآخر طبعًا كل الأسعار تغلى على الجميع.
دى طلباتى فى عيد الفلاح.. كل سنة وأنتم وبلدنا بألف خير.
 



التعليقات



بقلم رئيس التحرير

يا ولدى هذا جيشك العظيم

ولدى العزيز..
 أكتب إليك وإلى كل أبناء جيلك ممن يتعرضون الآن لأشرس وأخطر حرب تمر بها الأجيال وتمر بها البلاد. حرب ..

اشترك بالنشرة الاخبارية

الاسم
:
البريد
:
   
RSS TwitterFacebook