صباح الخير

sabahelkheir56@yahoo.com

رئيس مجلس الإدارة
عبد الصادق الشوربجي
رئيس التحرير
طارق رضوان

بـحـث

أهم الأخبار

الأخبار

اللص الذى أحبه

191 مشاهدة

20 اغسطس 2018
كتب : مؤمن المحمدي



ريشة الفنان: عمرو الصاوى


• أحب أقول بين قوسين
إن العبرة مش بـ «الميزور» (المازورة يعني)
يعنى مثلا
فى جمعية المؤلفين يقول لك
لازم يكون فيه 4 موازير
علشان يكون الملحن سرق
أنا بـ أعتقد إن دا خطأ
العبرة بـ صدارة الحتة
بـ شخصية الحتة
يعنى ممكن
تكون الحتة مكونة من مازورة
أو مازورتين
لكن فيها شخصية
تخليكى على طول تحسى
بـ إن الشخص دا واخدها
يعنى مش ضرورى أبدا
فـ لو الواحد خد حاجة زى دى
ولا قالش على الاسم
مفيش شك إنه يبقى....
- نَقَل
• نقل
- عملت إنت حاجة زى كدا؟
• آه عملت عملت
فى أول حياتى مفيش شك
- زى إيه كدا؟
• زى مثلا آآآآ
حتة زى الـ آآآآآ
أحب عيشة الحرية مثلا
أولها آآآآ
- تا تا تتتاااااا
• آه
أهى دى حتة مثلا
- تا تا تتااااا
• حتة صغيرة مثلا
لو تجيبى القانون وتحطيه
القانون بتاع جمعية المؤلفين والملحنين
اللى أنا كنت رئيسه
وأحطه كدا
يمكن آآآآ
لكن لأ
الحتة قطعا تبقى مسروقة
ليه؟
لـ إن الحتة دى لها شخصية
«تا تا تاااا» دى خليتها لها شخصية
انتهى الأمر
بقت دى حتة فى آذان الناس
ولها الصدارة
ولها الـ الـ الـ الـ آآآآ
الشموخ بتاعها كدا
ما تقدريش تقولى لأ
- على العموم
نقدر نقول إنك يعنى
عرفت الـ آآ
المستمع العربى الشرقى فى ذاك الوقت
بـ بيتهوفن
(تضحك ضحكة خفيفة)
• يعنى إذا حبيتى تجاملينى
لكن هى آآآآ
يعنى هى بايخة بايخة
ما أقولكيش لأ
هى حاجة بايخة
هى حاجة بايخة
لكن
أهو دا اللى حصل
يعنى حصل بعض حاجات زى دى مثلا
يعنى دى مثلا
يعنى عملت مثلا
حاجة عملتها مننننن
خدتها من من حاجة روسية
فى أول «يا ورد مين يشتريك»
إ إ إ يعنى ما تعتبرش زى زى الحتة الأولانية
لـ إن دى حتة فلكلورية
لكن كان لازم أقول.. مأخوذة.. من
وما قلتش لـ الأسف
- طب فكرنا بيها
• (يدندن المقدمة كاملة)
مثلا
- دى من....
• دى حاجة شعبية روسية
- فلكلور روسى
• آه
برضه خدته
وبرضه نقلته
وبرضه بـ كل أسف
ماااا قلتش إن دى مأخوذة
كان لازم أقول
لكن الواقع
فى الأوقات دى
الإنسان بـ يدور على نفسه
تفريغ نصى
لـ حوار بين عبدالوهاب وليلى رستم
طبعا معروف
فين كلام عبدالوهاب وفين كلام ليلى
تعيشى يا بلدى
فى خامسة ابتدائى
كان عندنا درس قراءة عنوانه «حيوان يرى بأذنيه»
الدرس كان عن الخفاش
(أو الوطواط أشيك)
كان الدرس مركز على تلات صفات لـ الخفاش
إنه نظره ضعيف
فـ يعتمد على حاسة السمع حتى فى الشوف
وإنه مش بـ يحب الشمس
أو خلينا نقول مش بـ يستحملها فـ بـ ينشط بـ الليل
وإنه لما بـ يشبط فى حاجة
مش ممكن يسيبها
الدرس دا
مس شغاف قلبى ومزق نياط فؤادى
مع إن قلبى هو فؤادى
وأنا لا كنت أعرف الشغاف ولا النياط
وليه الشغاف بـ تتمس والنياط بـ تتمزق
بس دا كان إحساسى
أنا عمرى ما شفت خفاش لـ حد النهاردا
بس الصفات التلاتة المذكورة
هى أميز صفاتى أنا شخصيا
رغم إنهم بـ يقولوا عنى ملول
إنما أنا ملول لـ إنى مش بـ ألاقى «اللى عايزه»
أول ما ألاقيه بـ أشبط فيه
ومش بـ أسيبه ولا بـ الطبل البلدى
إحنا كنا بـ نقول إيه؟
آه إحنا بـ نتكلم عن الخفاش
حكاية إنى «حيوان يرى بأذنيه» دى
خليتنى أتعلق بـ الراديو وما أحبش التليفزيون أوى
الراديو هو الأصل
كان عندنا كذا راديو (مش تسجيل)
كل واحد منهم ليه وقته ومكانه وقصصه
أهمهم راديو جابه خالى عبدالرحمن من ليبيا
مكنش حد بـ يحبه فى البيت
خالى نفسه اداهولنا علشان ولاده ما حبهوش
دا بقى كان حبيبى أنا
كنت آخده فـ حضنى
وأروح أقعد فى أى حتة على جنب وأسمع
إحنا كنا بـ نقول إيه؟
آه
إنى اتعلقت بـ الراديو
فـ كانت الأغانى أساس
وكان بـ يشدنى كمان صوت مذيع أو مذيعة الربط
اللى بـ ييجى قبل وبعد الغنوة
لما يقول
نستمع الآن إلى أغنية كذا من تأليف فلان وألحان علان وغناء ترتكان
ويرجع بعدها يقول
استمعنا إلى أغنية.....
ويروح يعيد نفس الكلام
هو دا اللى ربانى
على إن الغنوة مؤلف وملحن ومطرب
مش مطرب بس
كلمات ومزيكا وصوت
وأكيد مفيش «شكل»
شوية شوية
بقت أسماء المؤلفين والمحلنين مألوفة
زى أسماء المطربين بـ الظبط
وبدأت أعرف سمات كل مؤلف وملحن
ولـ حد دلوقتى
لو سمعت غنوة مش عارف اسم اللى كاتبها
أو اللى عمل لها المزيكا
أحس حاجة ناقصة
إحنا كنا بـ نقول إيه؟
آه اتعلقت بـ صوت المذيع
اللى كان بـ ينطق كل اسم بـ نبرة كدا
اللى مكنتش فاهمه بقى
يعنى إيه غناء «المجموعة»
إيه المجموعة دي؟
يعنى دى مطربة اسمها كدا
ولا فيه ناس معينين اسمهم كذلك
ولا دول الجن مثلا؟
علقت معايا حكاية إن دول الجن
لما كبرت
عرفت إن الإذاعة كانت بـ تنتج أغانى
يغنيها كورال الإذاعة
الكورال دا طبعا متغير
وإن كان ما يمنعش إنه كان فيه منهم «نجوم»
نجوم يعنى دول أسطوات الكورال
أساميهم أكيد مش معروفة
إنما أنا فضلت لـ حد ما عرفت أسماء بعضهم
الألفة والبريمو كان محيى الدين الخضرى
دا مثلا ممكن تسمعه صولو فى أوبريت عواد باع أرضه
وفيه كمان عمر الشنتورى وعبدالحليم فاروز
الخضرى والشنتورى وفاروز
هما اللى غنوا خلاص مسافر
وكانت شادية سنيدة ليهم
بـ النسبة لـ الستات
كان فيه تلاتة اسمهم وفاء وصفاء وسناء
أساميهم كدا فعلا
سناء الأخيرة دى
هى سناء البارونى أخت سهير البارونى
ومرات حسن الإمام
ليها أغانى صولو معروف منها «منديلى يا نينة»
وفاء وصفاء وسناء
عملوا لهم كورال مخصوص
اتغير كذا مرة
واتغير اسمه
لـ حد ما رسى على الثلاثى الطروب
اللى استمر فترة
وبقى «الثلاثى المرح» فى الآخر
ودا الاسم اللى اشتهروا بيه
إحنا كنا بـ نقول إيه؟
آه
أغانى المجموعة
من أغانى «المجموعة» اللى علقت
غنوة «عيشى يا بلدى يا بلدى تعيشى»
الغنوة دى كان فيها حاجة كدا
تقولش سحر
مع إنه زى ما حضرتك شايف
حاجة فرى سيمبل مش عايز أقول هبلة
إنما أنا حبيت الغنوة دى
وكل ما أكبر وتسقط حاجات
الواحد يكتشف إنه كان ساذج لما حبها
الغنوة دى تفضل وتزيد غلاوة
الغنوة دى
كتبها محمد العجمى
شاعر وملحن مالوش شغل كتير
محمد جوز خالة أنغام
أم أنغام وخالة انغام وخال أنغام مطربين
أمها نعمة إبراهيم خليل
وخالتها سهير إبراهيم خليل
وخالها فتحى إبراهيم خليل
إنما كانوا معروفين بـ أسماء تانية
أمها أمل شريف وخالتها ضحى
وخالها فتحى خالد
التلاتة كانوا معروفين أوى فى إسكندرية
هم إسكندرانية اصلا
وبـ يغنوا فى إذاعة إسكندرية
خالتها دى اللى اسمها ضحى
اتعرفت فى عموم مصر فترة
وجت الإذاعة العامة فى القاهرة
وكان ليها أغانى مشهورة وقتها
واتجوزت محمد العجمى
وفجأة اختفوا الاتين
رجعت إسكندرية ورجع معاها
غالبا ما استحملتش أجواء القاهرة وضغطها
فـ....
معلش بـ أسرح منك
إحنا كنا بـ نقول إيه؟
آه
غنوة عيشى يا بلدى دى
لحنها العظيم إبراهيم رجب
خد بالك فيه اتنين إبراهيم رجب غير بعض
واحد مؤلف أقدم من التانى الملحن
اللى بـ نتكلم عليه
إبراهيم رجب دا
اللى ملحن «أنا عايز صبية» و«يا بلدنا لا تنام»
و«يا بيوت السويس»
وكان له غنوة مع عدوية كتبها صلاح جاهين
اسمها «مجنون مجنون سيبونى»
إبراهيم فى غنوة عيشى يا بلدى
عمل حاجات نميسة
من اللى تخليك تقول يا ابن اللعيبة
زى إنه استعان بـ 3 كورال
واحد رجالى وواحد نسائى وواحد أطفال
توزيع «الأدوار» هنا حاجة مفتخرة
إمتى الأطفال تدخل
إيه الجملة اللى يقولها الرجالة
إيه جملة الستات
عارف إمتى يبان شغله
لما تسمعها من حد تانى أو فرقة تانية أو كورال تانى
فـ تلاقيها انطفت كتير
هو فيه حد تانى غناها؟
يوووووه
كتير
أنا أساسا بـ أكلمك عن الغنوة
علشان وأنا بـ أقلب النهاردا فى الحاجة
لقيت عندى تسجيل لها بـ صوت شريفة فاضل
فـ كنت عايز أدردش معاك شوية عن شريفة
بس الكلام دخل فى بعضه
إحنا كنا بـ نقول إيه بقى؟ •



التعليقات



بقلم رئيس التحرير

خطط الإخوان.. هدم الأمة

خونة ومرتزقة وقتلة ولصوص وتجار دين وجهلاء. هذا هو تصنيفهم وتوصيفهم. سرطان زرع فى قلب الأرض المقدسة. لم يطرح سوى الدم والدموع و..

اشترك بالنشرة الاخبارية

الاسم
:
البريد
:
   
RSS TwitterFacebook