صباح الخير

sabahelkheir56@yahoo.com

رئيس مجلس الإدارة
عبد الصادق الشوربجي
رئيس التحرير
طارق رضوان

بـحـث

أهم الأخبار

الأخبار

روسى روسى

70 مشاهدة

11 يوليو 2018
كتب : مؤمن المحمدي



5 يوليو 1982
ليلة بكى فيها القمر
الليلة اللى بدأ فيها السؤال السرمدى:
إيه اللى بـ يخلينا نحب دا وما نحبش دوكهه
والأهم
ليه بـ نحب دا أوى أوى أوى؟
فى حين إن الدنيا واسعة
ومليانة «حدود»
فـ إيشمعنى دا بـ الذات؟
ما تعرفش
ما تعرفش غير إن الحكاية دى
لو كانت حصلت مع حد تانى
مكنتش هـ تحكيها كدا
ولا من الزاوية دى
ولا بـ المشاعر دى
مثلا
فى العادى كنت هـ أحكى قصة باولو روسى
بـ محبة كبيرة لـ الولد الإيطالى
بـ محبة كبيرة وفخر
لكن
عندما يتعلق الأمر بالبرازيل
فلا تسألنى عن الأمن القومى ولا عن الموضوعية
روسى
لاعب زيه زى عشرات الآلاف من اللاعيبة
حاجة كدا زى ناصر ماهر
على ذمة نادى كبير (يوفنتوس)
لكنهم بـ يخلوه يلعب فى أندية متوسطة
لـ حد ما يبقى له مكان
أو ما يبقاش له فـ يبيعوه
فجأة
أزمة كبيرة فى الدورى الإيطالى
كان ممكن تهد اللعبة كلها على دماغ الجميع
تلاعب فى المراهنات
وورقة الدومينو اللى وقعت
هـ توقع كل الورق اللى بعده
كان ضرورى حد يدفع التمن ويشيل الليلة
ويلعب دور المسيح
يطلع ع الصليب ويفدى الجميع
الفادى هنا كان باولو روسى
اتوقف واتسجن
وقال إنه راضى بـ صليبه
علشان الكورة فى إيطاليا وجماهيرها
كاس العالم 1982 فى أسبانيا
المدير الفنى لـ المنتخب الإيطالى
يعلن القايمة اللى رايحة تمثل البلاد
فيها روسى
عاصفة من علامات التعجب والاستنكار
مين روسى دا؟
هو لسه حد فاكره؟
هو أساسا يقدر يجرى؟
دا بـ الكتير يتقال له كفارة
بيرزوت (المدير الفنى) ما اتهزش
فى المونديال نفسه
إيطاليا اتعادلت التلات مباريات وصعدت شفقة
وروسى ما شاطش حتى ع الجون
وقعت فى الدور التانى مع مجموعة
تضم معاهم البرازيل والأرجنتين
الأرجنتين حامل اللقب
والبرازيل حامل الألقاب
إيطاليا هى الحصالة بـ لا شك
ربنا كرمهم وكسبوا الأرجنتين 2/1
بس البرازيل كسبتها 3/1
يعنى البرازيل الرهيبة هـ تلاعب إيطاليا
التعادل كفاية لـ البرازيل
اللى هى طبيعى تكسب وتكسب كتير
فجأة
يطلع روسى الـ $% $$% يسجل هاتريك
هاتريك يا روسى! هاتريك!
إنت جى تفوق علينا؟
دا كان 5 يوليو 82 الحزين
كان عندى سبع سنين
إيه اللى يخلى عيل عنده سبع سنين
يبكى بـ الدموع عشان فريق اتغلب
علما بـ إنه محدش فى بيتنا بـ يشجع كدا
ولا لى عم عايش فى البرازيل ومستنى أورثه
فعلا مش عارف
كسبت إيطاليا وصعدت لـ قبل النهائى
قابلت بولندا اللى كانت معاها فى الدور الأول
وكانت على قمة المجموعة
ييجى روسى يسجل هدفين كمان
فى النهائى يسجل فى ألمانيا هدف
ياخد أحسن لاعب فى البطولة
والهداف
وأحسن لاعب فى العالم سنتها
وكمل مع يوفنتوس خمس سنين كمان
واعتزل 87 وبقى رجل أعمال قد الدنيا!
طبعامن فلوس المراهنات
يالا
هـ يروح من ربنا فين.•

إنبوكس


دلوقتى
بـ نقرا رسائل مى زيادة للعقاد
رسائل جبران إلى هاسكل
رسائل عبد الحكيم قاسم فى نوبة الحراسة
رسائل كافكا إلى ميلينا
رسائل سارتر إلى سيمون
ولادنا هـ يقروا
الشات بين فلان وفلانة
ماسينجر علان
إيميلات تركتان وفلتكانة
يوووووه
دا إحنا هـ نضحك ضوحك!.•

هولندا

عجيب أمركم أيها الهولنديون
عجيب عجيب يعنى
فعلا تاريخ المنتخب دا غريب مريب
يعنى ما هماش من المنتخبات العريقة
ما بدؤوش من الأول زى السويد وسويسرا
لكن لما ظهروا
ظهروا كـ إنهم مواليد المستطيل الأخضر
صعدوا مرتين ورا بعض نهائى المونديال
فى المرتين تخسر من الدولة المنظمة
مرة منهم بعد تهديدات بـ القتل لـ نجوم الفريق
على راسهم المرحوم كرويف
اللى ما لعبش فعلا نتيجة التهديدات
بـ المناسبة
هولندا هى المنتخب الوحيد
اللى لعب فى النهائى 3 مرات
وما عندوش ولا لقب
الأغرب بقى
إنه بـ يمشى على سطر ويسيب سطر
يعنى يا إما يوصل المونديال
فـ يكمل لـ السيمى فاينال
يا ما يوصلش من أساسه
حسب الجيل بقى
يعنى بعد اتنين نهائى 74، 87
ما وصلش 82، 86
كسب اليورو 88
وكان سيئة فى 90
لـ درجة إن اتعادل مع منتخب زيى منتخب مصر
وسجل فيها هدف
لاعب اسمه مجدى عبد الغنى
من المونديالات اللى الهولنديين عملوا فيها شغل كويس
وصلوا السيمى فاينال
مونديال 98
لعبوا فى الـ 8 مع الأرجنتين والسيمى فاينال برازيل
وخرجت بـ البلنات
ومين ينسى ماتش الأرجنتين
اللى خلصته فى الدقيقة 90
بـ واحد من أجمل عشر أهداف فى تاريخ المونديال
الجون اللى جابه بيركامب
اللى لازم يتشاف
الجون دا بـ الذات
ما ينفعش يتكتب عنه.•

بره المونديال

لما المدام تقول لك:
أجيب لك يا حبيبى حتة بسبوسة؟
أو طبق فاكهة
شوية رز بـ لبن
لازم يبقى عندك تقدير لـ مجهودها
لـ إن دا معناه
إنها هـ تغسل التلاجة بعد شوية
ومستخسرة ترمى البواقى اللى فيها
بـ يتعبوا والله
بـ يتعبوا.•



التعليقات



بقلم رئيس التحرير

خطط الإخوان.. هدم الأمة

خونة ومرتزقة وقتلة ولصوص وتجار دين وجهلاء. هذا هو تصنيفهم وتوصيفهم. سرطان زرع فى قلب الأرض المقدسة. لم يطرح سوى الدم والدموع و..

اشترك بالنشرة الاخبارية

الاسم
:
البريد
:
   
RSS TwitterFacebook