صباح الخير

sabahelkheir56@yahoo.com

رئيس مجلس الإدارة
عبد الصادق الشوربجي
رئيس التحرير
طارق رضوان

بـحـث

أهم الأخبار

الأخبار

الجوز الخيل والعربية والكورة المصرية

121 مشاهدة

19 يونيو 2018



واحد يسألني إنت ليه وإزاى بـ تتابع البطولات المحلية
بـ كل هذا الاهتمام؟
أقول لك
كان فيه ماتش فى كاس مصر
بين المقاصة والمريخ
واسمع بقى اللى جرى
أول حاجة اتنين لاعيبة من المقاصة
نزلوا لابسين رقم 14 والحكم ما خدش باله غير فى الشوط التاني
فـ واحد منهم لبس رقم 4
بعدين المقاصة سجلت هدف
ثم سجلت هدف تانى
وبعد دقيقتين كدا الحكم قرر إن النتيجة ترجع واحد صفر تاني
ليه
علشان الجون التاني جه من لعبة
أصلها رمية تماس على المقاصة
طب ما حسبهاش من الأول ليه؟
علشان ما شافهاش
طب والمساعد؟
برضه ما شافهاش
أومال مين اللى قال لـ الحكم إنها رمية تماس
الحكم الرابع
اللى هو بقى الحكم السادس
بس لسه بـ يسموه الرابع
ما علينا
طب لما الحكم الرابع قال له
حسب الهدف ليه؟
علشان مكنش مقتنع
طب ولغى الهدف ليه بعدين؟
علشان راجع نفسه واقتنع
تمام
الشوط التاني
الحكم طرد مودى بتاع المقاصة
علشان إنذارين بعدها بـ دقيقتين
طرد لاعب من المريخ طرد مباشر
اللاعب اعترض بس الطرد مشي
بعد شوية لقينا اللاعب لسه فى الملعب طلع الحكم قرر طرد لاعب تانى خالص بس برضه من المريخ
المريخ اتعادل
كدا بقت واحد واحد
وخلص الماتش لعبوا إكسترا تايم
لاعب من المقاصة أصيب
وكانوا غيروا التلات تغييرات
فـ المقاصة كمل تسعة
بعد شوية
لاعب من المقاصة انفرد بـ الجون
الباك بتاع المريخ شده بره منطقة الجزاء الحكم حسب فاول
وطلع كارت
الكل كان متوقع كارت أحمر
هو ادى اللاعب كارت أصفر بس
لاعب المقاصة اعترض وحصل هرج ومرج والحكم أصر على إنه كارت أصفر بس وأمر بـ استئناف اللعب
بعدين
فيه حد قال لـ الحكم حاجة فـ اكتشف
إن مدافع المريخ
اللى لسه واخد إنذار
دا الإنذار التانى ليه فـ طرده
والفريقين بقوا تسعة لاعيبة
فى الدقيقة 120
المقاصة سجلت الهدف التاني
والماتش خلص
وانتقلنا لـ الاستوديو
إعلانين ورجعنا
علشان المذيع يقول لنا إن فيه معلومة غير مؤكدة إن الماتش خلص تلاتة واحد لـ المقاصة
وبعد اتصالات تأكدوا فعلا إن فيه هدف تالت جه جه إمتى
بعد الماتش ما خلص إزاي؟
ما هو لما المخرج نزل بـ التتر ونقلها لكم مكنش الماتش لسه خلص
فـ إحنا انتقلنا لـ الاستوديو
بس لسه فاضل حبة
جه فيها الهدف التالت
بعد دا كله ييجى واحد يقول لى
بـ تتابع المباريات المحلية ليه؟•



التعليقات



بقلم رئيس التحرير

خطط الإخوان.. هدم الأمة

خونة ومرتزقة وقتلة ولصوص وتجار دين وجهلاء. هذا هو تصنيفهم وتوصيفهم. سرطان زرع فى قلب الأرض المقدسة. لم يطرح سوى الدم والدموع و..

اشترك بالنشرة الاخبارية

الاسم
:
البريد
:
   
RSS TwitterFacebook