صباح الخير

sabahelkheir56@yahoo.com

رئيس مجلس الإدارة
عبد الصادق الشوربجي
رئيس التحرير
طارق رضوان

بـحـث

أهم الأخبار

الأخبار

فين الريموت!

614 مشاهدة

6 يونيو 2017
كتب : شاهندة الباجورى



(مولاى.. إنى ببابك قد بسطت يدى، من لى ألوذ به إلاك ياسندى.. مولاى يا مولاى).
هى: ما شاء الله.. ما شاء الله يا حبيبى، إيه الإيمان والتقوى ديه.. ربنا يزيدك من نعيمه.
هو: طبعا ده شهر الصلاة والعبادات، طب خدى التقيلة.. أنا قررت ما اتفرجش على التليفزيون فى رمضان.
هى: بجد!.. ربنا يزيدك، وفى سرها (أحسن حاجة، علشان أتفرج براحتى على المسلسلات، وما تقعدش تحول وتضيع على الحلقات).
(بعد الفطار)
هو: إيه ده هى رواية «لا تطفئ الشمس» اتعملت مسلسل؟
هى (وقلبها متوغوش): تقريبا
هو: لا دى هى.
هى: بس رواية «واحة الغروب» معمولة أحلى بكتير.
هو: ياستى سبينى أحكم لوحدى، وسّعى كده شوية وهاتى الريموت، ولا أقولك قومى اعملى لنا شوية عصير مع الكنافة والبسبوسة، وولعى على الشاى.
هى: إيه، مليش دعوة أنا عاوزة اتفرج على «واحة الغروب».
هو: طب ياحبيبتى، روحى اعملى لنا الحاجات اللى قلت لك عليها عقبال ما الإعلانات تخلص، وصدقينى هندهلك أول ما المسلسل ييجى.
وطبعا دخلت أنا المطبخ وسامعة أصوات ضحك وتفاعل مع المسلسلات، وكالعادة نسيت نفسى وسط حللى وكوباياتى، وخرجت بعد ما حضرت لهم الحلويات لزوم الفرجة عالمسلسلات.
هى: إيه ده كل ديه إعلانات!
هو: هااه، إعلانات إيه دى!! .. ياااااااه .. ده أنا نسيتك معلش ياحبيبتى، هبقى أشوف لك الإعادة إمتى، اقعدى بس يا حبيبتى اتفرجى معايا.. ده مسلسل «ريح المدام» حلو جدا، ودمه خفيف، ولا مسلسل «30 يوم» كله أكشن وسسبنس.
هى: ريح المدام! إنت مش قلت هتتفرج بس على «لا تطفئ الشمس»، وبعدين إنت قلت مش هتتفرج على مسلسلات خالص السنة دى.
هو: سيبى بس الريموت، وتعالى اتفرجى على الحاجات اللى باتفرج عليها، ما إنتى عارفة ذوقى فى الاختيارات.. تحفة.
ومن هنا، كان لازم ألاقى حل.....
وبضحكات متقطعة شريرة.. الريموت هو الحل!
(تانى يوم)..
هو: فين الريموت، مش عارف أحول.
هى: مش عارفة يا حبيبى، تقريبا كان هنا، دور عليه ولو مالقيتهوش حولوا بقى من الريسيفر وخلاص.
وبعد محاولات مضنية لإيجاد الريموت اللى مش هيتلاقى لأن المدام خبته فى الميكرويف.
هو: يووه خلاص بقى، أنا تعبت من التحويل من الريسيفر كل شوية، خلاص والله ماأنا متفرج على حاجة، أقولك: أنا رايح أصلى التراويح فى الجامع أحسن.
هى: ربنا يقوى إيمانك ياحبيبى، ماتنساش تدعى لى معاك أنا والعيال، استنى أما اروح أودعك عند الباب.. هتوحشنى الساعتين دول.
وبعد غلق الباب:
هى: هيييييه، إجرى ياواد وهات الريموت من الميكرويف، وهات لى معاك صينية البسبوسة بالريد فلفيت، خلينى الحق أتفرج وأعوض الحلقات اللى فاتتنى.
وبعد ساعتين:
هو: أنا وصلت يا حبايبى، وجبت معايا مفاجأة.
هى: أكيد جبت لنا تورتة الكنافة بالآيس كريم من لابوار.
هو: لا كنافة إيه، ديه بترفع الكوليسترول، أنا جبت حاجة أهم بكتييييير.. جيت لكم ريموت جديد..........
هى: طب ألحق أنا أروح أعتكف فى المسجد، أشوف وشكم بخير، وابقوا سيبولى حتة من الريد فيلفت. •



التعليقات



بقلم رئيس التحرير

يا ولدى هذا جيشك العظيم

ولدى العزيز..
 أكتب إليك وإلى كل أبناء جيلك ممن يتعرضون الآن لأشرس وأخطر حرب تمر بها الأجيال وتمر بها البلاد. حرب ..

اشترك بالنشرة الاخبارية

الاسم
:
البريد
:
   
RSS TwitterFacebook