صباح الخير

sabahelkheir56@yahoo.com

رئيس مجلس الإدارة
عبد الصادق الشوربجي
رئيس التحرير
طارق رضوان

بـحـث

أهم الأخبار

الأخبار

الفلبينية جيالى.. والوالدة دعيالى!

1157 مشاهدة

30 مايو 2017
كتب : لميس سامي وريشة: احمد جعيصة



خلصت من شيماء الشغالة أخيرا كابوس وفوقت منه مش قادرة أصدق أنى خلصت من زنها، استغلاليتها، مواعيدها اللى عمرها ما ظبطت عشان دايما عندها حوارات ومشاكل يارب تكون  «شابوميا» مريحة عنها.. بالمناسبة «شابوميا» دى الفلبينية اللى بتشتغل عند أختي، وهى قالتلى إنها هتستغنى عنها يوم فى الأسبوع عشان تريحنى من اللف على مكاتب التخديم.. يا حبيبتى يا أختى فعلا ما يساعدكش إلا اللى منك.

وبمجرد ما بدأت ادندن وأرقص وأقول «اللى منك منك وأنت منه ياعم الشكل هو هو والدم هو الدم» وراح جرس الباب فصلنى وبنط من فرحتى «شابوميا» هتقلب كيان البيت الفلبينيات معروفين بالنظافة والانضباط دى جاية على دقة الساعة.. تيجى تشوف شيماء الانضباط عشان كده عمرنا ما هنتقدم طول ما مواعيدنا مش مظبوطة.
وبعد ما فتحت الباب
• أنا: هاى شابوميا «يا ويلكم يا ويلكم»
- شابوميا: كيفيك ماما.. هذا أدوات أنا «شابوميا بترص عدة الشغل».
• أنا يا حلاوة يا ولاد أنتى جاية بادواتك شابوميا.
- شابوميا «أيوه ماما كده يكون فى شغل مظبوط»
• أنا: أيووووه أهم حاجة الشغل المظبوط.. أدينى فى المظبوط احبك يا بطوط «إيه اللزاجة وتقل الدم اللى بقيت فيها دى ليها حق تبصلى بقرف» أحب أقولكم إن اللى يشوف شابوميا استحالة يقول إنها بتنظف شكلها ولبسها كأنها دكتورة.. دى إيديها أجمل من وشى أساسا مش بايشة من التنظيف.. أهى دى منظفة وشيماء منظفة بس دايما شيماء باين عليها الإرهاق والبؤس ما علينا.. طبعا أنا منبهرة بشابوميا نفس انبهار أى بيت مصرى بتعدى عليه  «أوشين» الصينية اللى معاها بجامات اللى استحالة متشتريش منها ومبحلقة فيها وراحت خضتنى وأنا بتأمل فيها وجيباها من فوق لتحت.
- شابوميا: خلاص ماما روح أجلس وأنا أنظف.
• أنا: لا شابوميا أنا هقف معاكى أول مرة أعرفك أماكن كل حاجة وبعد كده المرة الجاية مش هقف.
- شابوميا: لا ماما أنا فى معلوم.. أنا فى ترتيب خاص.
• أنا: معلوم!! يخرب بيتك يا مروة أنتى جيبالى ساحرة؟.. طيب يا شابوميا أنا هروح أتفرج على التليفزيون.. أخيرا هتابع المسلسل فايتنى فى حلقات كتير والعيلة كلها بتتكلم عن المسلسلات وأنا زى الهبلة وسطهم ما هو شيماء مكنتش مديانى فرصة لا أطبخ ولا أتفرج .. وفجأة صوت شابوميا بيعلى وبتتكلم ولا كأنها بتقول تعاويذ «لا تكون بتتفق مع حد ييجى يسرق البيت؟ لا مش معقولة هو البيت فى إيه يتسرق.. طيب تكون بتتفق تسرق العيال وتبيع أعضائهم.. يا حبايبى يا ولادي... لالا أكيد مستحيل إيه الأوفر ده يالميس شغل الصحافة أثر عليكى ولا إيه.. أكيد لا ماهى بقالها سنة مع أختى مشتكتش» منها.. أما أدخل اشوف بتعمل إيه.
• أنا: عايزة حاجة يا شابوميا
- شابوميا: لا ماما شكرا أنا فى كلام مع زوجى
• أنا: أهو حتى الفلبينيات صوتهم بيعلى مع أجوازتهم ملناش دعوة بقى بالمشاكل العائلية دي.
- شابوميا: زوج أنا مسكين ما فى أكل من الصبح
• أنا: أنتى بتتخانقى عشان مكلش.. معلش يمكن بيبعمل دايت
- شابوميا: لا هو ما فى أكل عشان أنا فى شغل.
• أنا: لقتنى بقولها يا عييينى ومن جوايا طبعا بقول «هو إيه المياصة دي» خلاص يا شوما اللى بياكل على ضرسه بينفع نفسه.
-  شابوميا: يعنى إيه ماما؟
• أنا: ده كلام جدتى خلاص متركزيش تحبى أنتى تاكلي؟
- شابوميا: لا ماما أنا فى شغل ما فى أكل مع شغل.
• أنا: يخرب بيت انضباطك
أما اتصل بمروة أختى أعرف أديلها كام.
• أنا: ألو يا مروة بقولك إيه شابوميا بتاخد كام
- مروة: أنتى يا بنتى قولى صباح الخير.. طابخين إيه النهارده مفيش حد بيدخل كده خبط لزق
• أنا: صباح الخير ادفع لشابوميا كام؟
- مروة: معرفش أنا بحاسبها بالشهر وبتاخد بالدولار معرفش هتعمل معاكى إيه ومتزعلهاش أنا ما صدقت واحدة تستحمل جنانى سلام دلوقتى لأن الإعلانات خلصت والمسلسل اشتغل.. إيه ده شابوميا مش طالعلها صوت تكون أتدلقت من الشباك أروح أطمن عليها.. وإذا بى أدخل الأوضة واتصعقت.. إيه ده الأوضة دى فى شقتنا ولا أنا دخلت الدولاب السحرى طلعنا على أوضة ملك بنت جارتي؟ أركز شويه لا دى الملاية بتاعتنا بنفس شخابيط فريد. وده الدولاب بس فين الاستيكر اللى عليه هى دهنته؟ وفين شابوميا.. واتصعق للمرة التانيه عشان شابوميا نازلة ليا من السقف كانت بتنظف المروحة.
• أنا: شابوميا معرفتش الأوضة
- شابوميا: شكرا ماما أنت فى مبسوط
• أنا: جدا يا شوما أنا معرفتش الشقة تسلم إيدك
- شابوميا: خلص ماما انا خلصت شغل
• أنا: بعد ما لميت شويه كراكيب وهدوم لشابوميا.. خدى دول يا شوما
- شابوميا: لا ماما أنا شكرا أنا ما فى لبس مستعمل
• أنا: طيب كم شابوميا
- شابوميا: أنا فى شغل 4 ساعات كل ساعة 12 دولار يعنى 48 دولار فى 18 جنيها يعنى أنا أريد 864 جنيه.
• أنا: أنتى مدرسة حساب.. وبعدين دولار إيه اللى هدفعلك بيه
- شابوميا: لسه ماما كمان أدفع أدوات التنظيف أنا جبته معاى ثمنه 400 ج كله مجموع 1264 كمان بعد الخصم 64 ج كله 1200 ماما.
• أنا: ماما ده أنتى اللى ماما.. شكرا شابوميا..  خلاص أنا هسافر هجرة لكندا الأسبوع الجاى ده آخر يوم تيجى فيه.
كده يا مروة ده أنا لسه بغنيلك اللى منك منك والله لحطلك رنة أنا خدت الضربة بجد من أقرب ناس فى حياتي.•



التعليقات



بقلم رئيس التحرير

يا ولدى هذا جيشك العظيم

ولدى العزيز..
 أكتب إليك وإلى كل أبناء جيلك ممن يتعرضون الآن لأشرس وأخطر حرب تمر بها الأجيال وتمر بها البلاد. حرب ..

اشترك بالنشرة الاخبارية

الاسم
:
البريد
:
   
RSS TwitterFacebook